Ньурба куоракка муус устар 12 күнүгэр Сергей Васильев аатынан паркаҕа ракетаны халлааҥҥа көтүтүү буолла.
Бу тэрээһини “Айар үлэ уонна инновационнай киин” старшай методиһа Егорова Марина Семеновна уонна Ст.Васильев аатынан элбэх хайысхалаах гимназия учуутала Егоров Александр Валентинович авиационнай хайысхалаах 8 «б» кылаас үөрэнээччилэрин Лазарев Дамиры, Егоров Айталы, Хартасов Айталы, Никифоров Германы кытта иилээн-саҕалаан ыыттылар. Бу тэрээһин эбии үөрэхтээһин киинигэр өр сылларга үлэлээбит педагог-ветеран Семенов Николай Дмитриевич уонна авиация ветерана Тихонов Михаил Афанасьевич сырдык кэриэстэригэр анаан ыытылынна.
Барыта 5 ракета кыырай халлааҥҥа көттө, бу ракеталар класс S3 диэн спортивнай моделльардаах эбиттэр. Ракеталары Александр Егоров үөрэнээччилэрин кытта конструктордаан таҥан оҥорбуттар.
“Три, два, один — поехали!” 🚀 ракета үөһээ халлаан диэки куйааран көтө турда, ону кытта мустубут оҕолор үөрбүт хаһыылара, соһуйбут сирэйдэрэ, үөрүү-көтүү сүпсүлгэнинэн паркабыт туола түстэ. Урааа!!! Биһиги даҕаны ракета хайдах көтөрүн көрдөхпүт!