Санкт-Петербурга айан…

Аҕа дойду Улуу сэриитигэр Ильмень күөлгэ буолбут кыргыһыы быйыл  80 сылын туоларынан  сибээстээн,  араас таһымнаах кэриэстэбил   тэрээһиннэр буола  тураллар.  Ити ыар сүтүктээх  сэриигэ  Саха сирин буойуннара хорсуннук охсуһан, олохторун толук уурбуттар да элбэхтэр. Ордук Бүлүү бөлөх оройуоннарыттан элбэх киһи кыттан хорсуннук сэриилэспиттэрэ, ким эрэ төрөөбүт дойдутугар төннүбүтэ, ким эрэ үйэ тухары онно хаалбыта.  Кинилэри үйэ тухары умнубакка кэриэстээн, кэлэр кэнчээри ыччакка тиэрдии хас биирдии киһи ытык иэһэ буолара саарбахтаммат.

Олунньу 19 күнүгэр Ньурбаттан  улахан делегация Санкт-Петербург куоракка бараары бэлэмнэнэ сылдьабыт. Онно А.Н.Чусовской аатынан Ньурбатааҕы  техлицейтэн “Искра» байыаннай-патриотическай клуб оҕолоро салайааччыларын Попов И.М,  Маар орто оскуолатын үөрэнээччилэрэ, Чукардааҕы А.Ф.Алексеев аатынан оскуола үөрэнээччилэрэ, учууталлара, алгысчыт  Сивцев А.И, Чаппанда оскуолатын музейын салайааччыта Сидорова Т.Д, Ильмень күөлгэ сэриилэспит буойуннар сыдьааннара  Лазарева Р.И, М.И, Өҥөлдьөттөн Ильмень күөлгэ баран сэргэ оҥорон туруорбут  Михайлов А.В дьиэ кэргэнин кытта, Дьокуускай куораттан эмиэ оҕолор кыттыһаннар барыта  35 киһи бараары  сылдьабыт.

Группабыт улахан салайааччыта, тэрийээччитэ Чукаартан төрүттээх  ТО “Северный колорит» директора Обоюкова В.В, Ньурба группатын салайааччыта МАУ ДО ЦТИТ,   ДОО “Ньурба эрэлэ” педагог-организатора Давыдова В.Я. Программабыт олунньу 21 -27 күннэригэр Санкт-Петербург кэрэ миэстэлэринэн айан, Ильмень күөлгэ ыытыллар  торжественно-траурнай митиҥҥэ кыттыы, сүгүрүйүү уонна кэриэстэбил бэлиэтин  братскай могилаҕа сибэкки ууруу, “Искра” клуб оҕолоро байыаннай дефилелара, музейдарга сылдьыы уонна Норуоттар икки ардыларынааҕы « Триумфальная маска» фестиваль –күрэххэ кыттыы буолар.

Барыахпыт иннинэ бэлэмнэнии үлэтэ күүскэ ыытылла турар. Ол  курдук оҕолорго уонна төрөппүттэргэ бу айан сыалын-соругун билиһиннэрии, өйдөтүү  чэрчитинэн “Ильмень күөлгэ» кинигэ ааптара, энтузиаст Васильев К.В уонна  Кыайыы 70 сылыгар Ильмень күөлгэ Ньурбаттан барса сылдьыбыт экспедиция  кыттыылааҕа Бушкова Р.С итэҕэтиилээх кэпсээннэрин долгуйан олорон истибиттэрэ, сүбэ-ама ылбыттара.

Өссө биир долгутуулаах түгэнинэн  Ильмень күөлгэ сэриилэспит уонна онно үйэлэргэ хаалбыт, Бордоҥ нэһилиэгиттэн  Семенов Игнатий Алексеевич сыдьаана Семенова Изамира Феодосеевна кэпсээнэ буолла, аймахтара дойдутун буорун уонна музейга биэрэргэ хаартыскалардаах раскладушка оҥорбуттарын  долгуйан туран туттарда.

Улуус админстрациятын аатыттан Тэрээһин мунньахпытыгар Территориальнай отдел начальнига  Кириллина Е.Д кыттыыны ылла уонна сүбэ-ама биэрдэ, ситиһиилэри баҕарда, улахан суолталаах, эппиэтинэстээхтээх миссия буоларын бэлиэтээтэ.

Бу уустук кэмҥэ айаммыт бырайыаһын барытын төрөппүттэр бэйэлэрэ уйуммуттарын хайҕыахха эрэ сөп. Ньурбаттан куоракка барарга уонна кэлэргэ транспорт транспорт боппуруоһун быһаарбыт салайааччыларбытыгар  Ил-Түмэн Бэрэссэдээтэлин солбуйааччытыгар Григорьева А.А, Улуус баһылыгын социальнай боппуруостарга солбуйааччытыгар Петрова Н.С, Үөрэҕирии начальнигын солбуйааччытыгар Котоконова Л.М, специалиһыгар Владимиров  К.А, МАУ ДО ЦТИТ директорыгар Ермолаева А.С уонна ТО “Северный колорит» директорыгар Обоюкова В.В махтаныах эрэ тустаахпыт.

Бу айан устатыгар сырдатыы үлэтэ кэмиттэн кэмигэр ыытыллыаҕа, оҕолорго инники олохторугар биир үтүө өйдөбүл буолуо,  НПК-ҕа үлэлэри суруйан, чинчийэн,  иитэр-үөрэтэр үлэҕэ, оҕолор билиилэрэ-көрүүлэрэ кэҥиэҕэ, патриотическай санааҕа иитиигэ  төһүү күүс буолуоҕа диэн туран  айан кыттыылаахтарыгар  барыларыгар  ситиһиилэри, тулууру, айымньылаах сырыыны баҕарабыт!

                Ньурбатааҕы группа салайааччыта В. Я . Давыдова.